2026 թվականին Concept Events-ը կազմակերպեց «Կապան՝ ԱՊՀ երիտասարդական մայրաքաղաք 2026» ծրագրի միջոցառումները՝ ապահովելով պաշտոնական բացման հանդիսավոր արարողության, միջազգային հանդիպումների, ֆորումների և մշակութային ծրագրերի իրականացումը։

Ծրագրի պաշտոնական բացման արարողությունը միավորեց ԱՊՀ անդամ պետությունների երիտասարդներին, պատվիրակություններին, գործընկերներին և ոլորտի ներկայացուցիչներին։ Միջոցառման շրջանակում տեղի ունեցավ նաև նամականիշի մարման հանդիսավոր արարողությունը՝ խորհրդանշելով ծրագրի մեկնարկը և դրա նշանակությունը։

Ծրագրի շրջանակում անցկացվեցին ԱՊՀ անդամ պետությունների երիտասարդական հասարակական կազմակերպությունների ֆորումը և ԱՊՀ Երիտասարդության հարցերով խորհրդի նիստը։ Մասնակիցները քննարկեցին երիտասարդական քաղաքականության արդի ուղղությունները, փորձի փոխանակման հնարավորությունները, միջազգային համագործակցության զարգացումն ու համատեղ նախաձեռնությունների հեռանկարները՝ նպաստելով գործընկերային կապերի ամրապնդմանը։

Միջոցառումների մասնակիցների համար կազմակերպվեց ճանաչողական այց դեպի Տաթևի վանական համալիր, որի ընթացքում հյուրերը ծանոթացան Հայաստանի հարուստ պատմամշակութային ժառանգությանը, վանքի դարավոր պատմությանն ու ճարտարապետությանը՝ բացահայտելով նաև Հայաստանի բնության գեղեցկությունը։

Ծրագրի մշակութային մասը ներառում էր գունեղ միջոցառումներ, տպավորիչ ցուցադրություն և համերգային ծրագիր։ Երաժշտությունը, հայկական մշակույթն ու տարբեր երկրների երիտասարդների միասնական ոգին ստեղծեցին տոնական մթնոլորտ՝ միջոցառումները դարձնելով հիշարժան։

«Կապան՝ ԱՊՀ երիտասարդական մայրաքաղաք 2026» ծրագիրը դարձավ երիտասարդական համագործակցության, մշակութային երկխոսության և նոր գործընկերությունների ձևավորման կարևոր հարթակ՝ ամրապնդելով ԱՊՀ անդամ պետությունների միջև բարեկամական կապերը և Կապանը ներկայացնելով որպես միջազգային երիտասարդական նախաձեռնությունների հյուրընկալ կենտրոն։